"Itang Milabas" (DoMiNiC V.) Sept. 11, 2006

"Itang Milabas"

Asna kanyaman balikan ing milabas king balen Baculud.
Katipa mu palengke kalesang makapila, ilang manenaya.
Ing gulisak na ning kutsero... 'hiya', 'hiya', 'tsk'...'tsk'...
At ing palatuk na ning kabayu...'tigidig', 'tigidig'...bibiye saya.
Panintunan mu ngeni uling pedicab at tricyle iya ng mag-hari.

Bantayug ng Crissot, tatang ning poecia at pamanyulat.
Metung kang pagmarul na ning balen, tune kang makata.
Bibiye inspirasyun at dangal keng dayang kapampangan.
Eskwelang 'Trade', kilala at magaling keng teknelidad.
Metung pamantayan pasalamatan at e dapat makalingwan.

Lumawut ka cabalenan, dasan mu reng mangatuang bale,
Panahon pa ning kastila atyu nala't makatalakad.
Yaring adobe, tisa't narra iyang magdalang tibe.
Sural a maaliwalas, hardin matanaman bibiye sigla.
Baculud, tuneng balen a masigla at mapayapa.

Kabilaang acacia at narra king dalan, bibiye silung.
Ing matuang pisamban, Apung Gemong ing padron.
Kasiping eskwela, eku kalingwan...mekilalang combentu!
Pipunpunan, ibpa't inda pati anak keti megaral.
Sta Maria Akademiya, pupugayan daka!

Ngening panawun iti, ala ng litratu't hugis para pigunaman.
Balen mibuwal king gabun dala na ning bunduk Pinatubo.
Obat mipakanyan? Dating balen masigla, ngeni mengulila.
Emuna aibalik masasayang oras, dapot eka makalingawan.
Dating balen Baculud, lugar na ning penibatan iyang balikdan.